Wilhelm: Shqiptarët në Serbi janë të diskriminuar

wilhelm-shqiptar-euml-t-n-euml-serbi-jan-euml-t-euml-diskriminuar_hdPas vizitës treditore në jug të Serbisë, ambasadori i Gjermanisë në Beograd, Heinz Wilhelm ka vlerësuar së shqiptarët në komunat e Bujanocit dhe Preshevës janë të diskriminuar dhe se këtë fakt duhet marrë seriozisht.

“Nga biseda që kisha me përfaqësuesit politik të shqiptarëve, kam vërejtur se këta njerëz kanë ndjenjën se në Serbi janë të diskriminuar. Mendojë se këtë fakt duhet kuptuar seriozisht”, ka thënë ambasadori duke u përgjigjur në pyetjen e “Blic-it”, se me çfarë përshtypje largohet nga komunat Bujanoc dhe Preshevë, transmeton Titulli.

Duke u përgjigjur matej në këtë pyetje, ambasadori ka thënë se në bisedimet e zhvilluara ka marrë përshtypjen se situata atje është e komplikuar, pasi shqiptarët në Bujanoc e Preshevë, shikuar në përgjithësi, “më shumë janë të drejtuar kah Kosova, Shqipëria e Maqedonia sesa Serbia”.

“Sigurisht që kjo paraqet një problem serioz për Qeverinë e Serbisë. Jam i bindur se këtë qeveria serbe e ka kuptuar. Këtë e tregon edhe marrëveshja e arritur, respektivisht “Plani për shtatë pikat”. Rreth kësaj unë kam biseduar me kryetarin e Trupit Koordinues për Preshevë, Bujanoc dhe Medvegjë, zotëriun Zoran Stankoviq, i cili më ka konfirmuar se vetëm ka filluar implementimi i saj”, është shprehur ambasadori Heinz Wilhelm.

Ai ka konfirmuar se për këto çështje ka biseduar me përfaqësuesit relevant të shqiptarëve, kryetarët e komonave Bujanoc dhe Preshevë Nagip Arifin e Ragmi Mustafën, deputetin popullor Riza Halimin si dhe kryetarin e Këshillit Kombëtar Shqiptar Galip Beqirin./Telegrafi/